മൂന്നാര്‍: എംജി കോളനിയില്‍ വാട്ടര്‍ ടാങ്കിന് സമീപം മണ്ണിടിച്ചിലുണ്ടായി വീടിന്റെ മുകളിലേക്ക് പതിച്ച് സ്ത്രീ മരിച്ചു. മൂന്നാര്‍ എംജി കോളനി കുമാറിന്റെ ഭാര്യ മാല ആണ് മരിച്ചത്. വീട്ടില്‍ ഉണ്ടായിരുന്ന ഒരു കുടുംബത്തിലെ തന്നെ നാലു പേരെ പുറത്തെടുത്ത് മൂന്നാറിലെ സ്വകാര്യ ആശുപത്രിയിലേക്ക് മാറ്റിയിരുന്നു.
ചൊവ്വാഴ്ച വൈകിട്ട് 5 മണിയോടെ ആയിരുന്നു സംഭവം അഗ്നിശമനസേന, പൊലീസ്, നാട്ടുകാർ എന്നിവർ ചേർന്ന് മാലയെ പുറത്തെടുത്ത് മൂന്നാറിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
വീടിന്റെ അടുക്കള ഭാഗത്ത് ജോലി ചെയ്തുകൊണ്ടിരിക്കുകയായിരുന്നു മാല. 20 അടിയോളം ഉയരത്തിൽ നിന്നും മണ്ണിടിഞ്ഞ് വീടിന്റെ അടുക്കള ഭാഗത്ത് വീഴുകയായിരുന്നു.വീട്ടിലുണ്ടായിരുന്ന മകളാണ് നാട്ടുകാരെ വിളിച്ചു കൂട്ടി രക്ഷാപ്രവർത്തനം തുടങ്ങിയത്. കുമാർ – മാല ദമ്പതികൾക്ക് മൂന്നു മക്കൾ ആണുള്ളത്. രണ്ടു പേർ നവോദയ സ്കൂളിൽ പഠിക്കുന്നു.
മൂന്നാർ ലക്ഷം കോളനി ഭാഗത്ത് അപകടകരമായ രീതിയിൽ ഉള്ള വീടുകളിൽ താമസിക്കുന്നവരെ സുരക്ഷിത കേന്ദ്രങ്ങളിലേക്ക് മാറ്റുവാനുള്ള നടപടികൾക്കും തുടക്കം കുറിച്ചിട്ടുണ്ട്.
