മൂവാറ്റുപുഴ: വാളകം പഞ്ചായത്തിൽ ഒഴുക്കിൽപെട്ട് കാണാതായ വയോധികയുടെ മൃതദേഹം കണ്ടെത്തി. റാക്കാട് ഗണപതി കടവിൽ നിന്ന് ഇന്നലെ ഒഴിക്കിൽപ്പെട്ട് കാണാതായ നെല്ലിമറ്റം അന്ത്യാട്ട് തങ്കമ്മ (74) യുടെ മൃതദേഹമാണ് ഇന്നലെ ഉച്ചയോടെ കണ്ടെത്തിയത്.
തങ്കമ്മയെ കാണാതായ കടവിന് സമീപം നാട്ടുകാരാണ് മൃതദേഹം പൊങ്ങികിടക്കുന്ന നിലയിൽ കണ്ടെത്തിയത്. തുടർന്ന് പോലീസിലും, ഫയർഫോഴ്സിലും വിവരമറിയിക്കുകയായിരുന്നു. മൂവാറ്റുപുഴ ഫയർഫോഴ്‌സ് സ്ഥലത്തെത്തി മൃതദേഹം കരക്കെത്തിച്ചു.
മേക്കടമ്പിലുള്ള മകൾ സിനിയുടെ വീട്ടിൽ എത്തിയതായിരുന്നു തങ്കമ്മ.
കടവിൽ മീൻ പിടിക്കാനെത്തിയവരാണ് തങ്കമ്മ മുങ്ങിത്താഴുന്നത് കണ്ടത്.
തുടർന്ന് ഫയർഫോഴ്സിൽ വിവരമറിയിക്കുകയും മൂവാറ്റുപുഴ, കോതമംഗലം ഫയർഫോഴ്സും, സ്കൂബ ടീമും മണിക്കൂറുകളോളം തെരച്ചിൽ നടത്തുകയും ചെയ്‌തു. എന്നാൽ ശക്തമായ അടിയൊഴുക്കിനെ തുടർന്ന് ഇന്നലെ വൈകിട്ട് 3 ഓടെ തെരച്ചിൽ അവസാനിപ്പിച്ചിരുന്നു.
മൂവാറ്റുപുഴ ജനറൽ ആശുപത്രിയിൽ സൂക്ഷിച്ചിരിക്കുന്ന മൃതദേഹം പോസ്റ്റ്മോർട്ടത്തിന് ശേഷം ഇന്ന് ബന്ധുക്കൾക്ക് വിട്ടുനൽകും.
