തൊടുപുഴ : കിണർ വൃത്തിയാക്കുന്നതിനിടെ കിണറ്റിൽക്കുടുങ്ങിയ മധ്യവയസ്കന് രക്ഷകരായി തൊടുപുഴ അഗ്നിരക്ഷാ സേന. ഇന്ന് രാവിലെ 8 ഓടെ തൊടുപുഴ മാർക്കറ്റിന് സമീപം മുക്കടം ചേരിയിൽ മേരി മാത്യുവിന്റെ വീട്ടിലെ കിണർ വൃത്തിയാക്കുന്നതിനിടയിൽ മൂവാറ്റുപുഴ കാഞ്ഞാംപുറത്ത് അനിൽകുമാർ കെ.ഡി (52) ആണ് കിണറ്റിൽ കുടുങ്ങിയത്. തുടർന്ന് തൊടുപുഴ അഗ്നിരക്ഷാ സേനയെത്തി അനിൽകുമാറിനെ രക്ഷപ്പെടുത്തുകയായിരുന്നു.
50 അടി താഴ്ചയുള്ള കിണറ്റിൽ ഓക്സിജന്റെ അളവ് കുറഞ്ഞതു മൂലം അനിൽകുമാറിന് ശ്വാസതടസം അനുഭവപ്പെടുകയും കിണറ്റിൽ കുടുങ്ങുകയുമായിരുന്നുവെന്ന് അഗ്നിരക്ഷാ സേനാ ഉദ്യോഗസ്ഥർ പറഞ്ഞു. തൊടുപുഴ അസിസ്റ്റന്റ് സ്റ്റേഷൻ ഓഫീസർ ജാഫർ ഖാന്റെ നേതൃത്വത്തിൽ ഫയർ ഓഫീസർമാരായ അനൂപ് പി.എൻ, ജയകുമാർ എൻ.എസ്, ശരത്ത് എസ്, പ്രവീൺ പി.പി, ഷാജി പി.റ്റി, കെ.എസ് അബ്‌ദുൽ നാസർ എന്നിവർ ചേർന്നാണ് രക്ഷാപ്രവർത്തനം നടത്തിയത്.
