മലയോര ഹൈവേയിൽ മെറ്റൽക്കൂന: വാഹനങ്ങൾക്ക് ഭീഷണി

ഇടുക്കി: കട്ടപ്പന നരിയംപാറയിൽ മലയോര ഹൈവേയിൽ കൂട്ടിയിട്ടിരിക്കുന്ന മെറ്റൽ വാഹനങ്ങൾക്ക് ഭീഷണി. ഹൈവേയിലെ അപകടസാധ്യത മേഖലയിലാണ് നിർമാണത്തിനായി എത്തിച്ച മെറ്റൽ റോഡിൽ കൂട്ടിയിട്ടിരിക്കുന്നത്. ഇരുചക്ര വാഹനങ്ങൾ ഉൾപ്പെടെ ഇവിടെ അപകടത്തിൽപെട്ടിട്ടും നീക്കാൻ നടപടി സ്വീകരിച്ചിട്ടില്ല. അടുത്തിടെ ടാറിങ് നടത്തിയ ഭാഗത്താണ് മെറ്റൽ ഇറക്കിയിട്ടിരിക്കുന്നത്. ഈ ഭാഗത്ത് ഗതാഗത നിയന്ത്രണവുമുണ്ട്. മുന്നറിയിപ്പ് ബോർഡ് സ്ഥാപിച്ചിട്ടും അപകടങ്ങൾക്ക് കുറവില്ല. കാൽനടയാത്രികർക്കും മെറ്റൽക്കൂന ഭീഷണിയാണ്. അടിയന്തരമായി മെറ്റൽ നീക്കി ഗതാഗതം സുഗമമാക്കണമെന്നാണ് നാട്ടുകാരുടെ ആവശ്യം.